¤سمعت سلاحي داخليه ولسه جديد وعايز اخد فكره عن الجيش....
بالنسبه للسلاح الداخليه اخف من الحربيه بكتير واعرف انك محظوظ انك سمعت سلاحك داخليه طبعا لما بتسمع سلاحك حقك تفرح وبتاخد معاد وتبدأ ترتب نفسك علي معاد السفر...
سلاح الداخليه
طبعا اي حد مسافر للجيش اول مره ميعرفش عنه اي حاجه ولا ف اي حاجه طبيعي هنا هتتعرف ع كل حاجه ومش هسيبك الا لما اخليك تروح مش ناقصك حاجه وفاهم كل التفاصيل....اولا..طبعا اول حاجه هتفكر فيها انك رايح حاجه جديده وغريبه عليك وانها حاجه هتبعدك عن اهلك وعن بلدك وبطريقه مختلفه ومجرد تقديمك للجيش كأنك بتشوف حلقه مصغره من جزء جديد من حياتك وهينتهي ف وقت معين سواء التعليم العالي سنه او التعليم المتوسط (دبلوم)سنتين او العادي خالص3 سنين...
من ناحيه انك قدمت ف الجيش ف داه معناه انك فعلا عملت حاجه صح( مشيت خطوه صح من بدايه حيااتك)...
*المطلوب مني اي في الحاجه اللي هسافر بيها...
طبعا هتجهز شنطه سفرك شنطه كدا تستحملك،
- طقم داخلي واحد واللي انت لابسه..
- شامبو اكيااس وليفه ومكن حلاقه
- فوم للحلاقه ومرطب بعد الحلاقه
- فوطه واحدة وطقم ترنج خفيف معاك
استعدادي للسفر كامل
الطقم اللي انت لابسه بس اللي هتروح بيه تاني.
*طيب من ناحيه المكان...
مكانك علي حسب بلدك طبعا ومعسكرات الداخليه كلها حلووه يعني متقلقش من حاجه...
#طيب من ناحيه النظام اول مااروح...
والله بالنسبه لمعسكر مبارك هتروح اول يومين هتتبهدل جامد اووي لانك مش متعود واول مره تدخل ف الجو داه وكدا،بس بعد كدا هتتآقلم وتتعود.
طيب من ناحيه اللي هيحصل معايا اول ما هروح...
بص معسكر مبارك مراكز منالمركز الاول للمركز السادس دا غير العمال والورش ومعهد التدريب..
المهم اول ما هتروح طبعا هتلاقي عساكر كتير زيك هتقعدوا كلكم وهيتكشف عليكم كلكم وهتتفرزوا وبعدين هتتوزعوا ع المراكز....
ف اللي هيروح المركز الاول-المركز التاني-المركز التالت الرابع الخامس السادس..
كل مركز وليه نظام ف التدريب..
التدريب ف المعسكر
اول ما تتوزع ع مركزك ف البدايه هتلاقي الوضع صعب وغريب وهتلاقي كل حاجه غريبه هتدخل مع صحابك العساكر وانتوا ماشين طبيعي تتعرفوا ع بعض واعرف من يوم دخولك عايزك تنسي كل حاجه برا وترمي الماضي كله ع الباب وانت داخل علشان متتعبش واتعرف ع اصحابك اللي داخلين معاك لان هما اللي هيبقوا اهلك وسندك ف فتره مركز التدريب...
*من ناحيه اي اللي هستلمه هناك...
استلام مخلتك مش شرط المخله شنطه..
- 2 عدد اڤارول لونهم( كاكي)كافيه فاتح
- قايش اسود(حزام شريط)
- 2 عدد فانله داخليه قطن
- 2 عدد شورط 1لونه كافيه والتاني لونه ابيض
- بتستلم بياده سمرا نص
- 5عدد شرابات قطن
- بجامه لونها لبني(ازرق فاتح)
- شبشب كروكس من العادي خالص
- مكنه حلاقه حديد بتغير موس عاادي
- فوطه صغيره+مظله(كاب)
- 2 عدد بطانيه.
ساعهالتعيين الغدا كل يوم.
سيرفيس الجيش
من هنا بقا يبدأ مركز تدريبك ياعسكري...
*طيب من ناحيه الآكل والدنيا هناك عامله ازاي...
بص المكان هناك كله رمل وشجر ومكان نضيف جدا جداا والآكل نضيف،مفيش مشكله من ناحيه المكان والآكل..
#من ناحيه اي الموجود...واي اللي ليا كل يوم من تعيين...
بص ياسيدي الموجود بالنسبه للمطعم...
- فراخ بانيه
- حواوشي
- فلافل
- مسقعه
- بطاطس
- برجر
- كبده
- بيض مسلوق...والاسعار مدعمه جداا
بص ياسيدي المتوفرك ف اليوم الآتي:
بالنسبه للفطار:
- 2 عدد رغيف عيش
- ادره فول بالزيت
- علبه جبنه فيتا حجم صغير
- فتله شاي
- 2عدد كيس سكر(ما يعادل3معالق سكر)
- 2عدد رغيف عيش
- مغرفه رز(يوم رز عادي ويوم بشعريه)
- اتنين وخميس من الاسبوع بدل الرز مكرونه
- مغرفه طبيخ(فاصوليا او لوبيا او فاصوليا خضرا او بسله او بطاطس مربعه)
- ربع فرخه او قطعتين لحمه(3ايام فراخ و2يوم لحمه)
- طماطم+خيار
- نوع من الفاكهه..(برتقان او بلح او يوسفي)المتوفر
- بصل اخضر او فلفل رومي+جزر
- 2عدد رغيف عيش
- علبه جبنه فيتا
- حلاوة او مربي
- لو ف الشتا يبقي فيه عدس.
ف..
- شاي
- ينسون
- كركديه
- نسكافيه
- بسكويت+كيك
- شيبسي+مشروبات غازيه
- سجاير آكيد
- في الفطارالصبح..متوفر
*ندخل بقا ع اهم مرحله: اللي المفروض هتفهمها مع الايام وهتتعود عليها مع الوقت ان شااء الله...
تدريبك ونوع تدريبك ومواعيد تدريبك.
من ناحيه تدريبك ف البدايه:
1-انتباه ودورانات لليمين وللشمال وللخلف وللأمام..
2-اهم شغل ف التدريب المعتاده العاليه ف البدايه اساس شغلك وف النهايه اساس شغلك...
شغلك اللي كل يوم بتعمله مبيتغيرش...
1-الصبح بتصحي الساعه5 بتتدخل حمامك وتزبط حالك لحد الساعه6...
2-الساعه6 بتتجمعوا كعساكر وتبدأوا ف الركض(الجري)لمده ساعه مع اداره صف ظابط التدريب...
3-الساعه7 معاد الفطار(بتفطر طبعا ولو هتشرب سيجاره اوتشرب شاي او ترتاح شويه لحد الساعه8..
4-الساعه8طابور القائد...
الشغل ف طابور القائد سويدي بدون سلاح وهما 12 تمرين..
كل فتره بتدرب ع 3 او اربع تمارين منهم...
ف البدايه كل حاجه صعبه ومعقده شويه بس بعد كدا بتتعود وجسمك بيتعود ع المكان والطبيعه والآكل والنظام والتمارين...
نص اليوم الاول كدا خلص...
بالنسبه لنص اليوم التاني...
طبعا الغدا حقك بتاخده قبل ما تديهم حقهم...
1-تمارين ع الخطوه المعتاده العاليه
2-تجويد ع شغل اليوم كله
بعد فتره ف دروس نظري عن السلاح وطبعا اللي فاهم ف السلاح كل حاجه بتبقي سهله بالنسباله....
وبكدا انتهيت من الجزء الاول من جيشك سلاح داخليه ف بدايه تدريبك وخروجك من الحياه الملكيه الي الحياه الميري...
ارجوا ان تفيدكم...
كلمه آخيره للعسكري ايام الجيش ايام متتعوضش عيش كل يوم بيومه وخليك فاكر انها فتره مش عمر وان اصحابك اللي هتقابلهم مش هيتكرروا تاني ومش هتشوف معظمهم عيش المرحله بصدر رحب..
سلام الله عليكم.
تعليقات
إرسال تعليق